Der Prophet Jesaja

Der Prophet Jeſáiá.

XVI.

151

Spruch gegen Moab

↑ Jer 48,1-47 | Zef 2,8-11

DIs iſt die Laſt vber Moab. Des nachts kompt ver­ſtö­rung vber Ar in Moab / Sie iſt dahin. Des nachts kompt ver­ſtö­rung vber Kir in Moab / Sie iſt dahin. ²Sie gehen hin auff gen Baith vnd Dibon zun Altaren / das ſie weinen / vnd heulen vber Nebo vnd Medba in Moab / Aller Heubt iſt beſchoren / aller Bart

iſt abgeſchnitten. ³Auff jren gaſſen gehen ſie mit Secken vmb­gür­tet / Auff jren Dechern vnd Straſſen heulen ſie alle / vnd gehen weinend erab. ⁴Hesbon vnd Eleale ſchrei­en das mans zu Jahza höret. Da­r­umb wehklagen die gerüſteten in Moab / denn es ge­het jrer Seelen vbel.

⁵MEin hertz ſchreiet zu Moab / Ire Flüchtigen fliehen von der dreyjerigen Kue / bis gen Zoar / denn ſie gehen gen Luhith hinan / vnd weinen. Vnd auff dem weg zu Horonaim zu / erhebt ſich ein jamer geſchrey. ⁶Denn die wa­ſſer zu Nimrim verſiegen / das das Hew verdorret / vnd das Gras verwelcket / vnd wechſet kein grün Kraut. ⁷Denn das Gut das ſie geſamlet / vnd Volck das ſie gerüſtet haben / füret man vber den Weidenbach. ⁸Geſchrey ge­het vmb in den grentzen Moab / ſie heulen bis gen Eglaim / vnd heulen bey dem born Elim / ⁹Denn die wa­ſſer zu Dimon ſind vol bluts. Dazu wil ich vber Dimon noch mehr komen laſ­ſen / beide vber die erhalten ſind in Moab des * Lewen / vnd vber die vbrigen im Lande.

16

Moab sucht Hilfe bei Juda

¹LIeber ſchickt jr Landsherrn Lemmer von a Sela aus der wü­ſten zum Berge der toch­ter Zion. ²Aber wie ein Vogel da hin fleugt / der aus dem Neſt getrieben wird / So wer­den ſein die töchter Moab / wenn ſie fur Arnon vberziehen. ³Samlet rat / hal­tet gericht / mache dir ſchatten des mittages wie eine nacht / Verbirge die veriagten / vnd melde die flüchtigen nicht. ⁴Las meine veriagten bey dir herbergen / Liebes Moab ſey du jr ſchirm fur dem Verſtörer / So wird der Treiber ein ende haben / die Verſtörer auffhören / vnd der Vntertretter ablaſ­ſen im Lande.

ES wird aber ein Stuel bereitet wer­den aus Gnaden / das einer drauff ſitze in der war­heit / in der hütten Dauid / vnd richte vnd trachte nach Recht / vnd fordere Gerechtigkeit.

⁶WIr hören aber von dem hoh­mut Moab / das er faſt gros iſt / das auch jr hoh­mut / ſtoltz vnd zorn gröſſer iſt denn jre macht. ⁷Dar­umb wird ein Moabiter vber den andern heulen / alle ſampt wer­den ſie heulen. Vber die grundfeſte der ſtad KirHareſeth wer­den die verlemeten ſeufftzen. ⁸Denn Hesbon iſt ein wü­ſte feld wor­den / der Weinſtock zu Sibma iſt verderbt / die Herrn / vn­ter den Hei­den haben ſei­ne edle Reben zuſchlagen / vnd ſind komen bis gen Jaeſer / vnd zihen vmb in der wü­ſten / Ire feſer ſind zuſtrewet / vnd vber das Meer gefurt.

⁹DArumb weine ich vmb Jaeſer vnd vmb den weinſtock zu Sibma / vnd ver­gie­ſſe viel threnen vmb Hesbon vnd Eleale. Denn es iſt ein Geſang in deinen Sommer vnd in deine Erndte gefallen / ¹⁰Das freude vnd wonne im felde auffhöret / vnd in Wein­ber­gen jauchtzet noch rufft man nicht. Man keltert keinen Wein in den keltern / Ich hab des geſangs ein ende gemacht. ¹¹Da­r­umb brummet mein hertz vber Moab / wie eine Harffen / vnd mein in­wen­di­ges vber KirHares. ¹²Als denn wirds offenbar wer­den / wie Moab müde iſt bey den Altaren / vnd wie er zu ſei­ner Kirchen gangen ſey zu beten / vnd doch nichts ausgerichtet habe. ¹³Das iſts / das der HERR da zu mal wi­der Moab ge­redt hat. ¹⁴Nu aber redet der HERR / vnd ſpricht / In dreien jaren / wie eins Taglöners jar ſind / wird die herrligkeit Moab geringe wer­den in der groſ­ſen Menge / Das gar ein wenig vberbleibe vnd nicht viel.

✽