Das 2. Buch Mose
Exodus

Das Ander Bucĥ
Moſe.

XIX.

III.3

AM SINAI

Ankunft am Sinai

IM dritten mond nach dem Aus­gang der kin­der Iſ­ra­el aus Egyp­ten­land / ka­men ſie die­ſes ta­ges in die wü­ſten Si­nai / ²Denn ſie wa­ren aus­ge­zo­gen von Raphi­dim / vnd wol­ten in die wü­ſten Sinai / vnd la­ger­ten ſich in der wü­ſten da­ſelbs / gegen dem Berg / ³Vnd Moſe ſteig hin auff zu Gott.

IV.

DIE STIFTUNG DES BUNDES

IV.1

DIE VORBEREITUNG AUF DIE GESETZGEBUNG

Gott erläutert seinen Bund mit Israel

VND der HERR rieff jm vom Berge / vnd ſprach / So ſoltu ſa­gen zu dem hau­ſe Jacob / vnd verkündigen den kin­dern Iſ­ra­el. ⁴Ir habt geſehen / was ich den Egyptern ge­than habe / vnd wie ich euch getragen habe auff Adeler flügeln / vnd hab euch zu mir bracht. ⁵Werdet jr nu meiner ſtim­me gehorchen / vnd mei­nen Bund hal­ten / So ſolt jr mein Ei­gen­thum ſein fur allen Völ­ck­ern / denn die gantze Erde iſt mein / ⁶Vnd jr ſolt mir ein prieſterlich Königreich / vnd ein heiliges Volck ſein. Das ſind die wort / die du den kin­dern Iſ­ra­el ſa­gen ſolt.

Das Volk nimmt den Bund an

⁷MOſe kam / vnd foddert die El­te­ſten im volck / vnd legt jnen alle die­ſe wort fur / die der HERR geboten hatte. ⁸Vnd alles volck ant­wor­tet zu gleich / vnd ſpra­chen / Alles was der HERR ge­redt hat / wöl­len wir thun / Vnd Moſe ſagt die rede des Volcks dem HER­RN wider. ⁹Vnd der HERR ſprach zu Moſe / Sihe / Ich wil zu dir ko­men in einer dicken wolcken / Auff das dis volck meine wort höre / die ich mit dir rede / vnd gleube dir ewigklich / Vnd Moſe verkündigt dem HER­RN die rede des volcks.

Das Volk wird auf die Begegnung mit Gott vorbereitet

DER HERR ſprach zu Moſe / Gehe hin zum volck / Vnd heilige ſie heute vnd morgen / das ſie jre Kleider waſſchen / ¹¹vnd bereit ſeien auff den dritten tag / Denn am dritten ta­ge wird der HERR fur allem Volck erab fahren auff den berg Sinai. ¹²Vnd mache dem volck ein Gehege vmbher / vnd ſprich zu jnen / Hütet euch / das jr nicht auff den Berg ſteiget noch ſein ende anrüret / Denn wer den Berg anrüret / ſol des tods ſterben. ¹³Keine hand ſol jn anrüren / ſon­dern er ſol geſteinigt oder mit Geſchos erſchoſſen wer­den / es ſey ein Thier oder Menſch / ſo ſol er nicht leben / Wenn es aber lange dohnen wird / denn ſollen ſie an den Berg gehen. ¹⁴Moſe ſteig vom Berge zum Volck / vnd heiliget ſie / vnd ſie wuſſchen jre Kleider. ¹⁵Vnd er ſprach zu jnen / Seid bereit auff den dritten tag / vnd keiner nahe ſich zum Weibe.

Gott erscheint

ALS nu der dritte tag kam / vnd morgen war / Da hub ſich ein donnern vnd blitzen / vnd ein dicke wolcken auff dem Berge / vnd ein dohn einer ſeer ſtar­cken Po­ſau­nen / Das gantz Volck aber das im Lager war / erſchrack. ¹⁷Vnd Moſe füret das Volck aus dem Lager / Gott entgegen / Vnd ſie traten vnten an den Berg. ¹⁸Der gantz berg aber Sinai rauchet / da­r­umb das der HERR erab auff den Berge fure mit fewr / Vnd ſein Rauch gieng auff / wie ein rauch vom ofen / das der gantze Berg ſeer bebete / ¹⁹Vnd der Po­ſau­nen dohn ward jmer ſtercker. Moſe redet / vnd Gott ant­wor­tet jm laut.

²⁰ALS nu der HERR ernider ko­men war auff den berg Sinai / oben auff ſei­ne ſpitzen / foddert er Moſe / oben auff die ſpitze des Bergs / Vnd Moſe ſteig hin auff. ²¹Da ſprach der HERR zu jm / Steig hin ab / vnd zeuge dem Volck / das ſie nicht erzu brechen zum HER­RN / das ſie jn ſe­hen / vnd viel aus jnen fallen. ²²Dazu die Prie­ſter die zum HER­RN nahen / ſollen ſich heiligen / das ſie der HERR nicht zuſchmettere.

²³MOſe aber ſprach zum HER­RN / Das volck kan nicht auff den berg Sinai ſteigen / Denn du haſt vns be­zeu­get / vnd geſagt / Mache ein gehege vmb den Berg / vnd heilige jn. ²⁴Vnd der HERR ſprach zu jm / Gehe hin / ſteige hinab / Du vnd Aaron mit dir / ſolt herauff ſteigen / Aber die Prie­ſter vnd das Volck ſollen nicht her zu brechen / das ſie hinauff ſteigen zu dem HER­RN / das er ſie nicht zuſchmettere. ²⁵Vnd Moſe ſteig hervn­ter zum Volck / vnd ſagts jnen.

✽