Das Buch Rut

Das Bucĥ Ruth.

III.

Rut befolgt Noomis Rat

VND Naemi jre Schwiger ſprach zu jr / Mein Tochter / Ich wil dir ruge ſchaffen / das dirs wol­ge­he. ²Nu der Boas vn­ſer Freund / bey des Dirnen du ge­we­ſen biſt / worffelt die­ſe nacht gerſten auff ſei­ner Tennen. ³So bade dich / vnd ſalbe dich / vnd lege dein Kleid an vnd gehe hin ab auff die Tenne / das dich niemand kenne / bis man gantz geſſen vnd getruncken hat. ⁴Wenn er ſich denn leget / ſo merck den Ort da er ſich hin leget / vnd kom vnd decke auff zu ſei­nen füſſen / vnd lege dich / So wird er dir wol ſa­gen was du thun ſolt. ⁵Sie ſprach zu jr / Alles was du mir ſa­geſt wil ich thun.

SIE gieng hin ab zur Tennen / vnd thet alles / wie jr Schwiger geboten hatte. ⁷Vnd da Boas geſſen vnd getruncken hatte / ward ſein hertz guter dinge / vnd kam vnd legt ſich hinder einen Mandel / Vnd ſie kam leiſe vnd decket auff zu ſei­nen füſſen / vnd legt ſich. ⁸Da es nu mit­ter­nacht ward / erſchrack der Man vnd erſchuttert / Vnd ſi­he / ein Weib lag zu ſei­nen füſſen. ⁹Vnd er ſprach / Wer biſtu? Sie ant­wor­tet / Ich bin Ruth deine magd / Breite deinen flügel vber deine Magd / denn du biſt der Erbe.

¹⁰ER aber ſprach / Geſegnet ſeiſtu dem HER­RN meine toch­ter / Du haſt eine be­ſſere barm­her­tzig­keit hernach ge­than / denn vorhin / das du nicht biſt den Jüng­lin­gen nachgegangen / weder reich noch arm. ¹¹Nu meine Tochter / fürchte dich nicht / Alles was du ſa­geſt / wil ich dir thun / Denn die gantze Stad meins Volcks weis / das du ein tugentſam Weib biſt. ¹²Nu es iſt war / das ich der Erbe bin / Aber es iſt einer neher denn ich. ¹³Bleib vber nacht / morgen ſo er dich nimpt / wol / Gelüſtets jn aber nicht / dich zunemen / ſo wil ich dich ne­men / ſo war der HERR lebt / ſchlaff bis morgen. ¹⁴Vnd ſie ſchlieff bis morgen / zu ſei­nen füſſen.

VND ſie ſtund auff / ehe denn einer den andern ken­nen mocht. Vnd er gedacht / Das nur niemand innen wer­de / das ein Weib in die tennen komen ſey. ¹⁵Vnd ſprach / Lange her den Mantel den du anhaſt / Vnd halt jn zu / Vnd ſie hielt jn zu. Vnd er mas ſechs mas gerſten / vnd legts auff ſie / Vnd er kam in die Stad. ¹⁶Sie aber kam zu jrer Schwiger / die ſprach / Wie ſtehets mit dir / meine Tochter? Vnd ſie ſa­get jr alles was jr der Man ge­than hatte / ¹⁷vnd ſprach / Dieſe ſechs mas gerſten gab er mir / denn er ſprach / Du ſolt nicht leer zu deiner Schwiger komen. ¹⁸Sie aber ſprach / Sey ſtille / meine Tochter / bis du erfereſt wo es hinaus wil / Denn der Man wird nicht rugen / er brings denn heute zu ende.

✽